Luk 17 | GAM | STEP | Jisas kogoye una moi al embe dji, una singare ke yeneke una kane pillgi djinj mal ge alla kerne. Una singare ke embe yene ge ye pa pineke, pora nadjinda ba, una wo embe yeneke womba kembis po djingjang yei dal, wal ke kambono boll wonda paro! Una ku kerman tublo i kambono numbkane al pagle, pup to worneke er nu solwara po nu no goye ge ngembill kembis dal goye. Ba God embe nayenda. Une ngembill kerman ke kaima ye aunda.

Luke 17

Una singare ke yene ge una nomane to ke yene

(Matyu 18.6-7 ne, 18.21-22 ne, Mak 9.42)

1 Jisas kogoye una moi al embe dji, una singare ke yeneke una kane pillgi djinj mal ge alla kerne. Una singare ke embe yene ge ye pa pineke, pora nadjinda ba, una wo embe yeneke womba kembis po djingjang yei dal, wal ke kambono boll wonda paro! Una ku kerman tublo i kambono numbkane al pagle, pup to worneke er nu solwara po nu no goye ge ngembill kembis dal goye. Ba God embe nayenda. Une ngembill kerman ke kaima ye aunda.

3 Ye kanpol tane. Ni agan ni moren al wo ye ke ye awi dal, ni man dje kere! djimben. Une nomane alla ake toi dal, une singare ke yei ge ni kere aumben. 4 Ege ta yenda ni agan wo kune 7-pela ye ke ye aunda. Alla kune 7-pela une yem wo, na ke yell, alla nayeno we dji dal, une singare ke yenda ge, ni kere aumben we dji.

Una pillgi djinj ge me embe mal paro

5 Aposel kambono Jisas moi al embe dji, no pillgi paro ge kembis paro; ni yembenka alla kerman panda we dji. 6 Jisas embe dji, iko mastat megye kembis moro mal ge, ye pillgi kembis embe pai dal, wal kerman yene. Ye iko malberi moro ge pille djimbe kanbe boll po solwara al aglo paye djine mal, iko ge po kaima aglo panda we dji.

Boi kogo yembon

7 Jisas kandja embe dji, boi una ta po kogo ye molo, kog sipsip kulo, mau to yale embe ye wanmoya. Taman pundaka er yem numb al wondaka, numb ne ge kandja namba we djinda? Ni ola dje wo kwa asamoll nambenka na are nano we djinda mo? Ge man. 8 Une embe djinda, ni kwa gale, allap wero, iwo aumbenka na kwa asamoll nano; ni are namben we djinda. 9 Boiye iwa ge kogo yenda mal yendaka, numb ne ge, ni wopake yen we djinda mo? Ge man. Boiye iwa ge kogoye yenda mal yei. 10 Yendo mal embe, ye Iwa Kerman kandja djinda mal pille po embe yei dal, ye kandja embe djine, nono boi una kiwa mormon, boi kogone yene mal ge kogo embe yepin we djine we dji.

Iwa 10-pela kenj toi Jisas ye wopake yei

11 Jisas er Jerusalem puno dje molo er Distrik Samaria ne, Distrik Galili pakna yepill al dumo kembis ta yei al ge pi. 12 Pika kenj toi una 10-pela wo une kane yepall ta ellke molo, 13 yau kerman to embe dji, Iwa Kerman Jisas o!, ni no wandill golo awe! dji. 14 Jisas kane embe dji, ye po ye gaklene ombine dje auneke opa gale ye awinj una kanne we dji. Une kandja embe djika, kambono er bon dje yemaka gaklene al porapora kiwa yei. 15 Iwa taimane ta kani, yene gakle al ge kiwa yeika, une er yem po yau kerman to God kandjiye amblo pla woro 16 Jisas kake al yage taimagaus pa molo embe dji, ni na ye wopake ye awin we dji. Alla, iwa ge Juda una man, une dumo Samaria iwa moi. 17 Jisas embe dji, una kenj toi moi una 10-pela moi, gaklene kiwa yei ba alla, iwa taimane ta dumo djell ta woi iwa ge yem wo God pille wopake we dje aundo mo? Iwa 9-pela ge er dje pi? 19 Jisas iwa ge moi al embe dji, ni aglo er piye! Ni pillgi djin pille gaklen al ge kiwa yero we dji.

Una Wombe are er pene wonda

(Matyu 24.23-28 ne 24.37-41)

20 Parisi una Jisas moi al embe dji, God dumoye kantau yenda ge kune nam yenda ne? dji. Jisas embe dji, God dumoye kantau yenda ge una kane ine naparo, pene nayero. 21 Mada ba yero mo, kola ellke yero we nadjine. God dumoye kantau yendo mal ge, ye boll pakna yendo.

22 Jisas yene kogoye una moi al embe dji, are ye kandja embe djine, Una Wombe wo ege taimane ta no boll aike moya dje piye ba, une ye boll namoya. 23 Una pende ye moye al embe djine, une woi kola moro we djine mo kwa moro we djine ge ye po nakanne! 24 Kam kunakna kupill al pol djindo mal embe, Una Wombe are yem wonda ge embe mal wonda. 25 Wonda ba asamoll una mop awo, yene gakle al ye ke kaima ye auneke alla are une yem wonda.

26 Asa Noa moi kune ge una singare yei mal embe are Una Wombe yem wonda kune ge, una singare embe mal yene. 27 Una asa yei ge kanpol nato molo, kwa mokna no, ana i, abone ipo iwa awo, embe ye molo pumaka, noa sip beke er numog pi. Po moika kam kerman toika nu wo una porapora to goi.

28 Iwa Lot moi kune ge una singare yei mal embe ye moyeke, alla are Una Wombe yem wonda kune ge embe mal yene. Una kanpol nato molo, kwa mokna no, wal top to i, wal maket ye, mau yale, numb take, embe ye molo pumaka, 29 Lot dumo Sodom kere er orko pi. Pika God ku bakill wamo kud boll kam tondo mal embe toika, una moi ge porapora do sege ye keri.

30 Una Wombe yem wonda kune ge una pillpol nato moi mal embe moyeke une wonda. 31 Una ta numb be moya ge alla er kal wo wal ta numog mogya ge i er napunda. Una ta mauye al wanmoya ge alla kere er yem numbiye al po wal ta mogya ge i er napunda. 32 Iwa Lot game gama asa goi mal embe ge ye pillpol to moye. 33 Una yenekne amblo wopake ye molo gun mopon dje yene ge, goye. Ba, una yenekne gaklene pille we naye molo po goi dal, gun molo pa moye.

34 Na kandja dje ye aundo, Una Wombe yem wonda kune ge una soka bo al ou pa mopell, ta i er punda ta kerda. 35 Ana soka plawa kogo yemboll dje ye mopellka, ta i er punda ta kerda. 37 Jisas kandja embe djika kogoye una embe dji, Iwa Kerman, ni kandja djinden ge dumo namkill yenda ne? dji. Jisas embe dji, wal ta golo panda al ge ka kekdim wo nane we dji.